Asoc. Cult. "Segredos de Pantón"

Segredos de Pantón: Dende a agrupación municipal do BNG, cales foron as súas proposicións para combater esta problemática?

Rosa-Ana Prieto Florines: No ano 2015 fixemos, en outubro, un acto informativo para indicarlle á xente que estábamos detectando irregularidades e que se debía reclamar en prazo. Era cando estaban chegando as cartas dos 60€. Estivo concorrido, pero a xente fíxolle caso, polo que soubemos despois, ao alcalde que lles dixo: “se pagades os 60€ iso quédavos así”, pero a realidade que é teimuda, amosou que o abandono e descoñecemento do noso rexedor do que estaba a acontecer, e despois demostrouse que as persoas,titulares catastrais, que non reclamaran naquela famosa carta dos 60€ aceptaban o que estas lle indicaban. Mágoa que non nos fixesen caso.

​

SdP: Como todos sabemos este problema afectou a toda Galicia, pero vimos ben con diferentes protestas e mesmo ca nulidade declarada polo concello, que en Pantón foi onde máis se amosou realmente o seu rexeitamento. Como puido darse este feito no noso municipio?

RPF: Este é un proceso con afán recadatorio que se inicia no 2013 por parte do Goberno do Estado, en particular polo “Ministerio de Hacienda” ao que pertence organicamente a Dirección Xeral do Catastro, é dicir, afecta a todo o territorio do Estado, agás a aqueles territorios con Facenda Propia que son Áraba, Gipuskoa, Bizkaia e Nafarroa, coincidentes coas actuais CC.AA. de País Vasco e Navarra.

O maior ou menor impacto ten que ver coa xestión de cada municipio, e no de Pantón, como noutros temas estamos abandonadas/os.

O recibo do IBI, da “contribución” en termos populares, é unha taxa que pagamos a cambio duns servizos, que por certo non temos en varias zonas do noso municipio.

Un procedemento de valoración colectiva consta das seguintes fases:

1. Comprobación ou toma de datos das características físicas e xurídicas dos inmobles que debe ser reflectido na cartografía correspondente.

2. Elaboración da Ponencia de valores, de acordo con:

• Planeamento urbanístico municipal.

• Estudo de mercado inmobiliario que se realiza, para establecer axeitadamente a referencia ao mesmo dos valores catastrais.

• Normas Técnicas de valoración catastral e a Coordinación “nacional” de valores.

3. Fixación dos valores catastrais de todos os bens inmobles, de forma masiva e informatizada.

4. Notificación dos valores a cada persoa contribuínte.

Ponencia de Valores: debe ser actualizada, ben a instancia do concello, ben da Dirección Xeral do Catastro, cada cinco anos, e de maneira obrigada cada 10 anos, de tal maneira que se sobe ou baixa o valor os importes quedan “prorrateados”, e non se lle xira de súpeto un incremento como o que aconteceu.

Nada disto se cumpriu no noso concello, e o resultado foi, e seguirá a ser que unha gran parte dos bens están mal catastrados, e a pesares das grandes cantidades pagadas, seguen os bens figurando de maneira errónea no Catastro.

Resumindo, as persoas contribuíntes pagaron os erros das administracións tanto local, o concello, como estatal, a Dirección Xeral do Catastro.

O que aconteceu no noso concello foi que se utilizou un proceso extraordinario de regularización en substitución dos procesos ordinarios, o que non é en ningún caso un incumprimento da parte contribuínte, mais foi a que o pagou. Xa que logo, trataron como evasores/as fiscais á maioría das persoas propietarias de Bens Inmobles.